السلام عليكم أصدقاء رؤية وكل سنة وانتو طيبين ان شاء الله ومرحبتين بيكم في فقرة #هياجة_في_الفضاء .
اليوم حنحكوا على موضوع هلال شهر #رجب .
في ناس واجدة شافت الهلال أمس وطلبت تعديل التاريخ .
اولاً نحن جمعية غير حكومية وظيفتنا كهواة فلك هي اعداد التقارير والرصد والمتابعة لبدايات الأشهر القمرية .
لكن التاريخ مش شورنا نهائياً .
التاريخ شغل الدولة!
ثانياً حبينا انّبوهكم على اشوي حاجات ممكن عينه من الناس مش فاطنتلهن .
اول بالبادي صلوا على رسول الله
اليوم في الأشهر القمرية يبدا من بعد غروب الشمس مش بعد الساعة 12 في الليل !
يعني ما تحسابوش ان يوم الخميس في الشهر القمري بيقعد لعند الساعة 12 في الليل والساعة 12 ودقيقة تبدا الجمعة !
الموضوع مش هكي نهائياً !
الموضوع يعني أن يوم الخميس اللي فات ( 07 / 4 / 2016 ) انتهى على غروب الشمس وبدا يوم الجمعة برضو بنفس التاريخ ( 07 / 4 / 2016 ) بعد غروب الشمس مباشرة .
فبعد ما غربت الشمس يوم الخميس ( 07 / 4 ) اللي هو يعتبر بداية يوم الجمعة ( إسلامياً ) كان يفترض إن الهلال يمكث لـ 12 دقيقة بالكثير، ويكون مكانا إيسار الشمس بمسافة 3 أصابع ” الي هن درجات سماوية ” وضوء الهلال هيكون 16. 0 % !
يعني 1 من عشرة في المية !
تي غير من هو اللي بيقدر يشوفه بعينه بالحالة هذي وللعلم راه حتى بالتلسكوب صعب جداً جداً إنك تقدر تشوفا.
وكيف ما كان متوقع يوم الخميس ( 07 / 04 ) بعد ما غربت الشمس ( بداية يوم الجمعة ) . مفيش حد شاف الهلال حتى بأحدث التلسكوبات لذلك أصبح من الطبيعي إنّ يوم الجمعة اللي بدا وقته ” إسلاميا ” من بعد غروب شمس يوم الخميس ويمتد لغروب شمس يوم الجمعة أمس إنه يكون مكمل 30 يوم لشهر المنسي الثالث ” جمادى الآخر “
مادام الأمور واضحة هكي باهي أمس شن صار بعد هذا كله ؟
اللي صار بعد المغرب الناس شافت الهلال كبير وبدت تعيط ! شفناه الجمعة المفروض اليوم هو أول يوم !! وكلام كي هالكلام !
وهذا غلط كبير جداً
أولاً : بعد ما غربت الشمس مباشرة قعد أمس هو يوم السبت مش الجمعة!
يعني اللي شفته هو هلال يوم السبت ( اسلامياً ) اللي قاعد انت تعيط وتقول ان اليوم ( تقصد بيه الجمعة ) أنه أول يوم ^^
وكلامك صح انه اللي شفته هلال أول يوم بس مش كجمعة ! هلال أول يوم كسبت لأن كيف ما قلنا يوم السبت ” إسلاميا ” يبدأ من بعد غروب شمس الجمعة لعند غروب شمس السبت.
ولو تتذكروا صلاة التراويح متاع رمضان أمتي يصلوا فيها ؟
مش يصلو فيها على اذان عشاء كبيرة رمضان.. وآخر يوم في رمضان ما يكونش فيه صلاة تراويح.
صح ولا أنا غلطان ؟
مرة أخرى نجوا لهلال أمس ( اللي هو إسلاميا شفتوه كيوم سبت ) قعد ساعة كاملة و 18 دقيقة وكان واخذ وضعه بسم الله ماشاء الله، وكان فيه أسباب أخرى فلكية واجد بسببهن شفناه كبير بالشكل هذا من ضمنها وقت تولد الهلال وعمره وبعده من الأرض ومقدار إستطالته كل هذي أسباب لابدا ناخذوا بيها.
ثانياً : أغلبية الفقهاء اعتمدوا الرؤية كشرط أساسي لدخول الشهر !
ويوم الجمعة ” إسلاميا ” ( الخميس بعد المغرب بالتقويم الميلادي ) 07 /4 . لم تسجل فيه أي حالة رؤية للهلال وبالنسبة للدول اللي اعتمدن يوم الجمعة راهو اعتمدن على لحساب بدون ما يتحقق شرط الرؤية وفيه تأكيد من اتحاد فلكي عربي إسلامي للكلام هذا، والإتحاد هذا وظيفته تسجيل حالات رؤية الهلال ويوم الخميس ماجاهش أي تقرير برؤية الهلالفي أي من الدول اللي المعتمدة عنده.
يعني بالفقه وبالدين و وفقاٌ لما تنص عليه الشريعة الإسلامية والفقه المالكي بداية شهرنا صحيحة 100% !
يعني الهلال اللي حتشفوه اليوم حيكون هلال يوم الأحد مش السبت !
واعتقد ان البلاد مش ناقصها ان نحن نختلفوا حتى في بدايات الشهور ! هذا شهر محرم وشهر مبارك فلندعوا الله فيه أن يوحد صفنا ويجمع كلمتنا على الخير والأمن والإيمان .
واسليمتكم
إعداد عطية الحصادي
